وسـام خـاطر تكتب : مـاتزعلش 

ماتزعلش علي كلمة حلوة قولتها أو موقف جدعنة عملته أو لحظة صدق أو دمعة نزلت بفرحتك لحد يمكن أصلاً ماتعرفهوش بس مجرد شوفت خبر مكتوب ليه في أي مكان. ماتزعلش لما تكون زعلان ومش لاقي حد جنبك و لا حد حاسس بيك. ماتزعلش علي مشاعر كانت جميلة في يوم من الأيام. ماتزعلش علي فكرة أتسرقت منك وكان نفسك تنفذها. ماتزعلش علي اللي أتكسر وضاع وأختفي ماهو لو كان نصيبك كان فضل وأستمر. ماتزعلش علي كلمة حلوة كنت منتظرها وماتقلتش. أو موقف معين ومحصلش. ماتزعلش لما تكون مستني فرحة وماتجيش ماهي أصل كل شئ بميعاد. ماتزعلش علي لبس كان نفسك تشتريه بس طلع غالي وأنت معكش تمنه. أو مكان كل ما تعدي عليه تتمني تقعد فيه بس يمكن غالي حبيتين أو مش لاقي لسه اللي ينفع يقعد معاك فيه. ماتزعلش علي أكله نفسك فيها ومش لاقي حد يعملها. ماتزعلش لما تصحي متأخر وفنجان القهوة يروح عليك. ماتزعلش علي اللي وجعك ماهو لولا الوجع ماكنتش أتحسنت. ماتزعلش لما تقع ماهو لولا الوجع ماكنتش أتعلمت تبص أودامك وتاخد بالك. ماتزعلش علي الصاحب اللي غدر. ولا علي القريب اللي طلع بعيد. أتعلم لأنك ماتزعلش بجد. أوعي تزعل لما تكون محتاج حد جنبك ومتلاقيش. أو تبص حواليك وتلاقي الأماكن فاضية ماهو أصل المكان ماينفعش يتملي غير باللي يليق بيك. ماتزعلش علي الورد اللي دبل أو يمكن مجاش من الأساس. أو علي الهدية اللي كانت عندك أغلي من كنوز الدنيا بس أتنست. أوعي تزعل أصل كل شئ بميعاد. بلاش تكسر جواك الحلو اللي محليك. خليك زي ما انت بكل مافيك. اللي يزعلك أرميه وماتفكرش أبداً فيه. خليك مع اللي يفرحك ومهتم بكل التفاصيل. خليك دايماً نقطة في أول وأخر سطر ما ينفعش يتكتب الا بيك وليك. أنت علي فكرة محدش يشبهك ولا ممكن يكون زيك أنت هو أنت بكل ما فيك. فأوعوا بقي تزعل دا أنت حتة السكر اللي محليا مرارة الأيام. فتخيل بقي كده هو في سكر بيكون سبب مرارة أبدا دا السكر دايما بيحلي وبيغير كل حاجة للأحلي. فياريت ماتزعلش وأفرح وفرح اللي بيحبوك وسيب كل شئ نصيب واللي مجاش بكره ربنا يبعت خير وسعادة يعوضوه. عيش أصل ببساطة وقتنا علي الكوكب لحظات معدودة فيا تعشها ياتعشها بس المهم هاتعشها زعلان ومكشر ولا مبسوط وفرحان.