الرئيس السيسي عن الباعة الجائلين: الغلبان فى رقبتى لازم أرقيهم وأطورهم دول أهلنا
تطرق الرئيس عبدالفتاح السيسي لقضية الباعة الجائلين خلال حوار مفتوح مع طلبة كلية الشرطة، وقال: "علشان أحل مسالة الباعة الجائلين في القاهرة عاوز محلات كتيرة وبأسعار معقولة علشان الناس تقف فيها..عندك خيار من الاثنين، يا تمشيهم بعيد والناس دي تاكل ازاى؟، وانا في النهاية لو قلت الـ 2مليون ملهومش مكان ويلا امشوا من هنا محدش يعمل كده ، ويحل المسالة بان الأمن يتصرف ، لا، احنا نتصرف ، انا كمحافظ اتصرف أشوف أماكن فاضية وأجهزها محلات وبسعر مناسب واجيب الناس دي تقف فيها وأرقيها وأطورها دول أهلنا".
وأضاف الرئيس السيسي: "وأنا وزير للدفاع كنا بنطور طريق مصر الإسكندرية الصحراوي، جه المسؤولين ياخدوا مني تصديق باخلاء الباعة الجائلين قلتلهم اعملوا محلات وخد الناس دي وحطها في محلات وهتلاقيهم كانوا موجودين دلوقتي".
وتابع الرئيس: "لازم نرقى نفسنا ونغير حياة الناس بفكر، لكن الأول منجبيش نقول هنوديها فين؟ طيب الناس دي تروح بيوتها ازاي؟، هو احنا عاوزين نحل المسألة كده ، نغسل أيدينا بسرعة ، لا ، لازم نبذل جهد ونشقى كمسؤولين ومحافظ.
وقال الرئيس: "عملت تحت الكبارى محلات علشان ازود حجم المعروض وبدل الكوبرى تحت منه مش لطيف بقا شكله لطيف وأقعد حد فيه ناس تاكل عيش، ده مش قصور من الدولة لكنها حالة مصرية ازاى نحلها ؟، كلنا قلبنا على قلب بعض والغلبان في رقبتي ورقبتك ، ولو مكوناش كده ربنا هيحاسبنا ، ازاى النهاردة عندي 2 مليون بائع جائل يعني 2 مليون اسرة؟.
