أشرف عبد الكريم يكتب : ضفيرة ومريلة

فاكرة أول مرة شوفتك

كنتي لابسة يومها إيه

عقد فل بقلب أبيض

لما شوفته جريت عليه ..

كنتي لسة صغيرة

بالضفيرة والمريلة ..

كانت الضحكة ف عيونك

وردة نادية معطرة

كنت لما ببص ليكي

أقول لروحي إيه جرى ..

دحنا لسة صغيرين

لسة عارفك من يومين

لسة أول يوم دراسة

ع الفصول متوزعين ..

لما جرس الفسحة نادى

رحت ادور انتي فين

كنتي واقفة في ركن هادي

قولت اسأل انتي مين ..

والغريب اني عرفت

أنها سألت عليا

من سعادتي لقتني طيرت

بانت الضحكة ف عنيا ..

لما قربت إليها

شوفت صورتي في عنيها

وبكسوف بدأ السلام

وأبتدت قصة غرام ..

كنا لسة في سنة أولى

كنا نضحك في الخصام

هو ده حب الطفولة

هي دي أيام زمان ..