حوار خاص مع ” نهال كمال المهدي ” الممثلة الصاعدة ؛ التي أدت دوراً متألقاً في مسلسل ” أبو العروسة ” الجزء الثاني ، ودائماً تطمح للوصول لأعلي درجات النجاح والتميز

س : إية أكتر موقف مؤثر في حياتك ؟؟ 
ج : ياااه موقف واحد دول كتير أوي مش عارفه والله أقولك إيه ولا إيه منهم ، بس في مواقف حياتية زي وفاه خالتو وده بالنسبة ليا أكتر حاجة بعدتني عن الحياة شوية علمتني كتير أوي ، في المجال بتاع شغلي ودراستي الناس اللي مكنتش مؤمنة بيا دي بتديني خطوة لقدام من غير ما ياخدوا بالهم .

س : هل أهلك كانو موافقين تدخلي المجال ده ؟؟ 
ج : اها وكانوا مشجعني جداً ، بس كانوا خايفين عليا طبعاً بس ثقتهم فيا كانت أكبر من اَي خوف أنا كنت بدرس في جامعة بنها تجاره انجلش بس سبتها من تانية وقدمت في المعهد .

س : لو الزمن رجع بيكي الى ورا إيه الحاجة الي هتعمليها أو مش هتعمليها ؟؟ 
ج : معتقدش إن في حاجة ؛ كل حاجة أنا بفكر فيها وبديها وقتها مع إني في نفس الوقت عايشة من غير اَي تعقدات يعني عندي أمل في بكرة وواثقه إن ربنا شايل لكل واحد حاجه كبيرة قدام فا بعمل الحاجة اللي بحسها .

س : إية ردود أفعال الناس وأهلك علي شغلك ؟؟ 
ج : كانوا مبسوطين جداً وأكتر حاجة بتبسطني لما بيقولي إحنا فخورين بيكي وبيبقا عندهم ثقة فيا ؛ ده بيديني أمل .

س : إية الهدف الي عايزة توصليه للناس من خلال مجالك ؟؟ 
ج : نفسي الناس كلها تحس ببعض ويعيشوا حياه هادية وميبقاش في عنصرية ولا طبقات ولا مشاكل وأحاول أطرح وأحل جزء من المشاكل الحياتية اللي بتقابل الناس .

س : إية خطواتك الفترة الجيه ؟؟ 
ج : المعهد من وجهه نظري خطوه مهمه جدا والسعي ثم السعي ثم السعي و الإجتهاد وإن كل واحد يشتغل علي نفسه وينمي موهبته ويبقي عنده ثقة في نفسه ومتمكن من أدواتة وعارف يستخدمها إزاي ومييأسش خالص لو مجتش النهاردة هتيجي بكرة ولو مش بكرة هتبقا بعده باْذن الله .

س : إية المعوقات الي قبلتك في بدايتك ؟؟ 
ج : إن أنا مكنتش أعرف حد خالص ومازلت علاقاتي محدودة وده بسبب طبيعتي شخصيتي ومكنتش عارفه أروح فين ولا أجي منين ولو في كاستنج أعرف إزاي طب أروح إزاي 
، حاجة كمان وزني كان ٧٢ كيلو وكان عندي مشكلة إن كل ماكنت أعمل كاستنج يقولولي خسي فضلت سنتين بحاول لحد ما أخدت قرار مع نفسي وبقيت ٦٣ كيلو ومحتاجه لسه أخس تاني .

س : مين أكتر حد وقف جنبك ، تحبي تقوله إي ؟؟ 
ج : ماما وبابا و أخواتي وخالد أحب أقولهم إن من غيركم أنا ولا حاجة وإنتوا الظهر والسند بحبكوا أوي .

س : إحكيلي بقا من أول ما بدأت في مجال عملك لحد دلوقتي ؟؟ 
ج : دخلت الأكاديمية درست إشتغلت علي نفسي إشتغلت مسرح وبعدين بداية دخولي التليفزيون من مسلسل
" السهام المارقة " رمضان اللي فات مع أستاذ" محمود كامل "
وبعدين دلوقتي بصور في مسلسل " أبو العروسة " وبتمنا ربنا يوفقني وواثقة إن اللي جي خير باْذن الله .

س : كلمة للفانز بتوعك ؟؟ 
ج : بتمنا أكون عند حسن ظنكوا و إنكوا تشجعوني وتفضلوا ورايا وديماً أقدملكم كل اللي يعجبكم ؛ بحبكم جداً .

بنشكرك يا نهال علي الحوار الجميل ده وربنا يوفقك وتحققي كل الي نفسك فيه ❤