أشرف عبد الكريم يكتب: عيش وملح

مش بعيد لما تشوفني

تقول ده كان صاحبي ف يوم

واما ييجي وشك في وشي

بالدموع تبكي العيون ..

تفتكر ماضي انت بعته

والندم هتجيب في سيرته

عيش وملح معايا كلته

وبالخيانة إبتديت ..

كنت أغلى حد ليا

كنت اخويا ونور عنيا

كنت كل الدنيا ديا

بس ياخسارة انتهيت ..

ياما شيلت وراك بلاوي

انت تجرح وانا أداوي

كنت زي شيطان مخاوي

ياما على غدرك داريت ..

بكرة جاي بجرح يوجع

سكة اللي يروح ما يرجع

في النهاية الكل ودع

انت بعت وانا اشتريت ..

ألف ميت مليون ندامة

ع الصحاب وعلى الملامة

يالله روح ومع السلامة

كنت صفحة وانطويت ..

كله بايع كله راضي

ناسي ربه وقلبه فاضي

إمتى يسمع للمنادي

وف صلاته يقول نويت ..

يالله حي على الفلاح

اصحى وقت الفجر لاح

اقرا أذكار الصباح

قبل ما تقول يوم ياريت ..