ياااه ع الحلم !! بقلم - أحمد حسن عمر
أنباء اليوم -
نفسي الحلم
دا يبقي حقيقة
نفسي احقق
نفس الحلم
دقيقة دقيقة
جري وبحر
وحضن وخضرا
وضحكة بريئة
.
كنا بنلعب
( غمض فتح ) كل شوية
قلبنا يرقص
واحنا بنغطس تحت المية
كنا بنرسم فوق الموجة
خطوط احلامنا
كانت لعبه خطيرة رقيقة !!!
.
زي الاطفال كنا ساعتها
قلبي اطمن من ناحيتها
سابقت كل الموج
ضحكتها. !!!
اجمل فرحة
لما تخفف عنك ضيقة
.
لسه حبيبة القلب شقية
ولسه جريئة
لسه عيونها بتسحر فيا
ولسه مضيئة
خضرا عيونها
زي الزرع
شفت الموجة بتغرق فيها
حتي مشاعري
معاها غريقة !!!
لسه جمالها بيطرح ورد
ولسه العطر
بيطفي حريقة
يااااااااه ع الحلم
ياااه ع الحلم
نفسي الحلم
دا يبقي حقيقة !!!!
....
احمد حسن عمر