جريدة أنباء اليوم المصرية

حوار أنباء اليوم المصرية مع الممثلة الشابة أسماء ماهر سليم و دورها في مسلسل بيت الشدة

الممثلة الشابة/ أسماء ماهر سليم
حوار - إيمان حجاج -

لكل حوار بداية وبدايتنا المرادي مع ممثلة شابة والدها في الوسط الفني من زمان جداً وأثبت نجاحه في أدوار كتير والدور الأكثر شهرة هو شخصية " زيكا " في مسلسل بوجي وطمطم ، رغم بداية طريقها إلا أنها أثبتت وجودها في أكثر من دور في عدة أعمال درامية .

حوارنا مع الممثلة الصاعدة أسماء ماهر سليم إبنه الفنان الراحل ماهر سليم والتي كان لها أثر مميز في مسلسل بيت الشدة الذي عُرض في

دراما رمضان ٢٠٢٢.

المسلسل أيضاً يضم نخبة من عمالقة الفن والدراما مثل" الفنانة"

وفاء عامر وأحمد وفيق، إيهاب فهمي، محسن منصور، أحمد التهامي، مدحت تيخا، محمد مهران، عبير منير، صبري عبد المنعم، لبنى ونس،

ومدير التصوير عزمي الرحماني، مخرج منفذ محمد بدير،

مستشار إعلامي هاني صابر،

و المسلسل من تأليف ناجي عبدالله وتحت إخراج وسام المدني

ومن إنتاج شركة اكسيليفون للإنتاج الفني.

_في بداية الحوار حابيين نعرف أكتر عن أسماء ماهر.

أسماء ماهر سليم بدرس في المعهد العالي للفنون المسرحية قسم التمثيل و الإخراج عندي ٢٤ سنة

_متى بدأتِ رحلتك الفنية؟

بدأت رحلتي منذ طفولتي كنت بمثل دوبلاچ وأنا صغيرة و بعدين مسرح لكن في الدراما بدأت بمسلسل نقل عام

_هل كانت بداياتك الفنية متعارضة مع حياتك الدراسية ؟

لامش متعارضة لأن دراستي هي شغلي أنا بدرس في المعهد العالي للفنون المسرحية قسم التمثيل و الإخراج

_كيف توازنين بين حياتك الشخصية وأعمالك الفنية والأكاديمية ؟

طبعا في صعوبة في وزن الشغل و دراستي داخل الأكاديمية و الحياة الشخصية بس هي المسألة مسألة أولويات و ترتيبات في أوقات كتير باجي علي نفسي علشان خاطر التصوير و المعهد

_هل واجهتي أي صعوبات خلال مشوارك الفني؟

وماذا كان رد فعلك ؟

لا الحمد لله مفيش اي صعوبات لحد دلوقتي

_ ما هي الأعمال الفنية اللي حضرتك شاركتي فيها من بداية مشوارك ؟

أول مسلسل كان نقل عام إخراج الاستاذ العبقري عادل أديب وهو مش مخرج وبس هو إنسان حقيقي جميل و بعد كدا مسلسل الحلم إخراج أستاذ حسني صالح و كنت ضيفة شرف في مسلسل لون البحر ولسة متعرضش و أخر حاجة مسلسل بيت الشدة

_ من هو مثلك الأعلى في الوسط الفني ؟

أنچلينا چولي بتعلم منها كتير جداً

_ من وجهة نظرك التمثيل موهبة أَم هوايه؟

التمثيل موهبة طبعآ لأن دي حاجة بتكون موجودة داخل روح كل ممثل ولكن في ناس بتنمي الهيبة التي وهبها الله لنا وفي ناس مبتحبش و طبعا في ناس بتبقي عايزة تدخل التمثيل كحب ولكن الحب لا يكفي لأن التمثيل دراسة و علم بعد الموهبة

_من الذي شجعك علي الخوض في مجال التمثيل ؟

الحقيقة أنا من زمان وانا نفسي أمثل بس بابا مكنش لسة عارف انا فعلا عندي الموهبة دي ولا لا و الي تنبأ ليا بدخولي التمثيل دكتور أشرف زكي قالي أول ما تكبري قدمي في المعهد العالي للفنون المسرحية و انتي هتبقي نجمة كبيرة ، وبعد كدا بابا بس بابا اتصدم طبعا بعد ما اتقبلت في المعهد العالي للفنون المسرحية و اتصدم من رد فعل الدكاترة لانة مكنش يعرف أن أنا موهوبة بالصورة الكاملة اللي الدكاترة و المخرجين وصلوها له

_ ما هو الدور الذي يلهم شخصيتك في العادي ؟

الأدوار الكوميدية جداً

_لو أسماء هتقدم نصيحة لأي شخص مقبل علي التمثيل هتكون أيه؟

إنه ينمي ثقافتة علشان لما يقدم دور يكون دور هادف و يقدمه بشكل صحيح

_ من وجهة نظرك ما الذي يفتقده الفن حالياً عن قبل ذلك؟!

زمان الفن كان حقيقي يعني ممكن أتفرج علي فيلم من كتر المصداقية يلمسني ، دلوقتي البعض وليس الكل الموضوع بيكون سطحي ودا طبعا دا مش مستحب لأننا في الأول و الأخر بنوصل رسالة ويجب أن تصل صحيحة ليستقبلها الجمهور بشكل صحيح ف إحنا ممكن نقول اننا بنفتقد المصداقية

_ دورك في مسلسل بيت الشدة واللي جسدتي فيه شخصية إنچي إبنه الدكتورة مني واللي كانت بتجسدها الفنانة مها أحمد ، هل إنچي أثرت علي أسماء في شيئ ؟ وإيه مدي التشابه والاختلاف بين الشخصيتين ؟

شخصية إنچي فيها كتير أوي مني لما كنت أصغر من كدا كان يعتبر التفكير طايش كان ممكن أي حد يقول كلمة جميلة تتصدق وهي دي بالفعل شخصية إنچي ولكن دلوقتي لا أنا تقريبا عكس شخصية إنچي تماماً في الوقت الحالي يعني إنچي كانت بتخبي عن مامتها حاجات كتير أنا مبعرفش أعمل دا خالص لا بالعكس بحب أقول لماما ، في إختلاف كبير

_ ما وراء الكواليس ، ممكن حضرتك تقوليلنا تصريحات خاصة لأنباء اليوم المصرية عن دورك في المسلسل وهل كانت التجربة كويسة بالنسبة لحضرتك ولالا ؟

الحقيقة تجربتي دي من أجمل التجارب اللي مريت بيها أنا مبسوطة بالدور و بنجاح الدور و ردود الأفعال من دكاترتي و الناس بشكل عام و استفدت جداً من العمل مع كل الكرو و استفدت من مها أحمد أكتر حاجة لأن هي من الممثلين المجتهدين برا و جوا اللوكيشن ف دائما بتعلم منها و استفدت من النجمة وفاء عامر بالرغم إني ممثلتش قدامها للأسف ولكن كنت بتفرج عليها و بتعلم منها كتير و اتعلمت من المخرج الاستاذ وسام الميدني طبعاااااااااا لأن هو أصلا مخرج شااااطر ، مسلسل بيت الشدة إضافة ليا كبيرة

ما الذي ينتظره الجمهور من ممثلتنا الجميلة الفترات المقبلة ؟

لسة مفيش حاجة للأسف

حضرتك حابه تضيفي أي شيئ في نهاية حوارنا أو توجهي كلمة لحد؟

أه أنا حابة اوجة كلمة ل بابا في نهاية الحوار أنا عايزة اقول( إن أنا امتدادك في الدنيا ).

النجاح هو إدراك ذاتك وقدراتك فطريق الألف ميل يبدأ بخطوة...... في الختام أقدم خالص شكري وتقديري للفنانة أسماء ماهر علي هذا الحوار الممتع وأتمني لها المزيد من النجاح والتوفيق.