الإكتئاب .. ”سجن الأحزان” بقلم - ملك رمضان
يقول الله تعالى في كتابه العزيز :
بسم الله الرحمن الرحيم
{مَا أَصَابَ مِن مُّصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا إِنَّ ذَلِكَ عَلَى اللَّهِ يَسِيرٌ لِكَيْلَا تَأْسَوْا عَلَى مَا فَاتَكُمْ وَلَا تَفْرَحُوا بِمَا آتَاكُمْ وَاللَّهُ لَا يُحِبُّ كُلَّ مُخْتَالٍ فَخُورٍ}
صدق الله العظيم
حبيت أبدأ بـ الآية القرآنية اللي كلنا عارفينها قبل ما اتكلم عن أخطر مرض بيهدد البشرية بعد مرض السرطان، وبرغم ذلك أن لسة في أغلبنا لحد النهاردة مش مدرك خطورة المرض وبيتعامل معاه علي أنه برد وهيعدي،
- الإكتئاب مرض موجود، وبسبب المجتمع ومعتقاداته أدى إلى أن مرضى الاكتئاب بيخافوا يواجهوه أو حتى يعترفوا بمرضهم، ولأن القبول العام للمرض قليل ودا بسب وصمة العار الكبيرة حول الأمراض النفسية، المريض بيرفض يعترف بمرضه، بس الحقيقة إن مرض الاكتئاب بيهدد حوالي 300مليون شخص حول العالم و2مليون ونص حاله اكتئاب في مصر وإن في سنه 2030 العجز هيتجاوز 6% وهيزداد عدد الوفيات بسب الاكتئاب أكتر مرة ونصف من سرطان الثدي، ولك أن تتخيل إن 25%من مرضى الاكتئاب بيفقدوا حياتهم بسب جهلهم بالمرض وعدم اعترافهم بيه
طب اي حياتنا هتقف !!
الحقيقة أنه لا ، قبل ما ابتدي كلامي فكرتك بالآية القرآنية اللي كلنا عارفينها عشان اقولك متخافش اطمن اللي مكتوبلك هو دا اللي شوفتوا ولسة هتشوفوا، لكن مش معناه إنك تقف مكانك وتستسلم لأي حاجة تقابلك في حياتك حتى لو كان مرض ذي الاكتئاب وانك لازم تقول انك محتاج المساعدة لو لزم الأمر وانك متسبش نفسك لحظة واحدة للتشوهات الفكرية؛
- موقع life sciences نشر مقولة بيقول فيها "إن البشر يميلون لتذكر الذكريات السيئة اقوى من تذكرهم للذكريات الجيدة" وانك ممكن بسب أفكار مشوهة توقف حياتك لفترة كبيرة جداً عشان حدث قابلك كسرك أو وجع اتوجعته أو علاقة انتهت كنت فاكر إنها هتكمل أو مشروع دخلته بكل جهدك وكنت متأكد من نجاحة وتنقلب الموازين وكل حاجة تتغير فتحزن، عندنا مفهوم كدا في الشريعة بيقول "ما لا يدرك كله لا يترك كله" يعني اللي مكملش متحزنش عليه لكن متسيبش كل حاجة وتقرر الانسحاب الحقيقة انك بتبني لنفسك سجن من الأفكار السامة اللي تقدر بسهوله من اول خبطة تدخلك في دايرة الاكتئاب .
صدقني لو وقفت مع نفسك في دقايق وقررت انك مش هتسيب نفسك لاكتأبك ولا افكارك السامة يهزموك هتقدر تكمل لو وقفت مع نفسك لدقايق وقررت طلب المساعدة لتشخيص حالتك صدقني هيفرق كتير بالنسبالك وبمجرد ما تعدي من اكتاءبك وزعلك وازماتك هتخرج منها انسان قوي واكتر نضوج ".