كلمات من القلب في ذكرى نصر اكتوبر
بقلم د/رفيق عفيفى
يا ولاد بلدي و بناتها يا مفتحين في بساتينها كما الورود
لازم تعرفوا تاريخكم و أسماء بتلمع م الآباء ويا الجدود
عاوز احكيلكم حكاية عن ذكري النهاردة ف كلام ودود
دي مش حكاية دي حكايات عن البطولة ملهاش حدود
من أول قائد إسمه السادات و رتب كتيرة من ظباطنا مع الجنود
كانوا أبطال كلهم تطير نسورهم في السما و اللي عالأرض أسود
كان العدو اللعين هجم علينا من سنين و سرق مننا أرضنا سينا
و سينا أرض مقدسة مذكورة في القرآن و طبعاً غالية علينا
أي شبر ف أرضنا مكانه جوه قلبنا و لازم نصونه بعينينا
سنين إغارات علي العدو و نحرق أي نقطة تطولها إيدينا
قصص بطولات و سجلها التاريخ سلاحنا لم يسقط من بين إيدينا
بني عدونا اللعين خط و إيه سموه حصين بيصيع علينا
و شبكة نابالم بعيون بتفتح عالقناة حالة عبورنا لأرض سينا
عقول مصرية جبارة قلوبها مليانة جسارة رسمت الخطة المتينة
خطة لتمويه العدو و كله نايم في العسل و حالة كاملة م السكينة
و في يوم ٥ من اكتوبر رجالتنا عامت و سدت فتحات نابالهم اللعينة
و تاني يوم في عز الضهر بدأنا في السما بهجوم النسور
كام طلعة جوية اللي هي دكت حصونهم قتلت فيرانهم في الجحور
طيارات و دبابات و مدفعية و مشاه كله بيحرق في أهل الشرور
و أسودنا تصيح الله أكبر وبسلاحهم عبروا القناة لأرض سينا عالجسور
و يومها طبعاً كان صيام رمضان و لسه بدري عالفطور
كان هناك ساتر ترابي منيع و داب بخراطيم المياه بقي كرماد البخور
كل فكرة اتسجلت باسم صاحبها ف سطور و السطور بتشع نور
و في ٦ ساعات شلينا العدو و اكتملت ملحمة العبور
رفع علمنا في السما علي أول شبر في سينا كأنه علامة للمرور
كام يوم و تدخل حامي العدو بخطة لوقف النيران
كالعادة دايماً إذا تدخل يفتري و يرتدي زي الشيطان
عنها و يخبط في الكلام و ينحاز للعدو لئيم و يخل بالميزان
و دخل قائدنا بعد الهدنة في حرب تانية اسمها مباحثات سلام
خاضها أسود كما في الحروب و نصر تاني بس بزين الكلام
رجعت لنا كل حبة رمل علي أرض سينا بالتمام
وقع بطلنا مع العدو بعدها بكام سنة معاهدة سلام
تتفق أو تختلف مهما كان افتكر ان الحرب فيها كتير من الآلام
عاوزك تكون مطمن علي بلدك طول ما رجالة جيشك تمام
بس إصحي و صحصح و عينك علي بلدك دايماً تصونها م اللئام