ألبوم الذكريات  ..

بقلم الشاعر / أشرف عبد الكريم

لما نزلت دمعة مني
روحت أدور ع اللي فات
روحت جايب صورة امي
ويا ألبوم ذكريات ..

شوفت صورة حلوة ليا
بانت الضحكة ف عنيا
م الحنين مديت إيديا
وافتكرت حاجات كتير ..

لما كنا ف ابتدائي
والطابور بنشيد بلادي
ولا حفلة عيد ميلادي
لما كنا صغيرين ..

كنا في العيد الصغير
نصحى م النجمة نغير
نلبس الطقم الجديد ..

فرحانين بقلوب نقية
نجري ناخد العيدية
والجميع بيكون سعيد ..

كل صورة بتحكي حاجة
كل وقت وفيه سعادة
قولها للجيل الجديد ..

هو ده الزمن اللي عدى
خد معاة كل المودة
هو ده الحب اللي كان ..

هي دي الفرحة اللي كانت
عايشة جوانا وماتت
هي دي أيام زمان ..