حوار خاص مع ” ڤيولا سعد ” صاحبة بيوتي سنتر ” فيولا ” من أجمل مصففات الشعر وخبيرة التجميل .
-
س : في البداية عرفينا بنفسك ؟؟
ج : ڤيولا سعد ، 24 سنة ، إتولدت في أسكندريه دراستي سياحه وفنادق .
س : أي أكتر موقف أثر عليكي في حياتك ؟؟
ج : المواقف المؤثرة في حياتي هو نجاحي ده إللي أثر في حياتي .
س : لو الزمن رجع بيكي أيه الحاجة إللي هتعمليها وأيه الحاجة إللي مش هتعمليها ؟؟
الزمن لو يرجع بيا لورا الحاجة إللي هعملها أني هبدأ في شغلي برضه بس مكنتش فتحت مكان (سنتر ) بدري كده .
س : هل أهلك كانوا موافقين علي شغلك ؟؟
ج : أهلي أه طبعا هما سبب تشجيع ليا هما كانوا مؤمنين بنجاحي بس أنا حققت أكثر من إللي هما توقعوه .
س : أي ردود أفعال الناس ع نجاحك ؟؟
ج : ردود أفعال الناس وأهلي مصدقوش فعلا نجاحي وإللي وصلتله في شغلي وعلاقاتي مع الناس ، طبعا ناس فرحتلي وناس بعدت عني بس ده طبيعي وأهلي طبعا من الأسباب الرئيسية في نجاحي خاصه أخويا مسبنيش لحظه ودايما واقف في شهري وبيقويني وبيشجعني .
س : هل شغلك ليه هدف في حياتك الجاية ؟؟
ج : الهدف طبعا من خلال شغلي هو اني أشوف الفرحه في عيون العرايس في أهم يوم في حياتها فـ مش بتنساني أبدا .
س : أي خطواتك الجاية في شغلك ونجاحك ؟؟
ج : الخطوات الجايه أني مقفش عند حاجة ويكون ليا أكثر من فرع .
س : أي النصيحة إللي تحبي تقوليها لكل بنت نفسها تشتغل في المجال ده ؟؟
ج : نصيحتي للي فعلا عاوزه تكون حاجة كويسة أنها تصدق نفسها وتصدق أنها هتوصل مهما كانت الصعوبات إللي هتقابلها .
س : أحكيلنا أكتر عن شغلك ؟؟
ج : من أول ما بدأت طبعا أشتغلت علي قرايبي وأصحابي وكان في تشجيع وكان في انتقادات هي إللي خلتني أحسن طبعا ونفسي أنجح وأوصل أكتر ، لحد ما بابا وأخويا صدقوا وأتاكدوا أن أنا قد المسئولية أني أكون صاحبه ومديره مكان كبير فيه عاملين كتير وأنا في السن الصغير ده وبس وفتحت فعلا المكان وبقالي حاليا 3 سنين والحمد لله مكان ناجح جدا في أسكندرية وليه أسمه والهدف فعلا هو خدمه الجيست علي أحسن مستوي مش الفلوس وبس .
بشكرك جدا يا ڤيولا ع الحوار الممتع ده وبنتمنالك التوفيق دايما ومن نجاح لنجاح انشأ الله ❤
