حوار خاص مع ” ناني حمدي” الموديل مكيب التي تتألق في شغلها دائما ، وتتطلع دائماً للتقدم .
-
س : في البدايه عرفينا بنفسك؟؟ ج : ناني حمدي، 19 سنه، اتولدت في شبرا و عايشة في شبرا .
س : ايه هي قصة حياتك في المجال ده؟؟ ج : كنت فالأول و ده كان أول مره أشتغل في حياتي مش في المجال ده بس كان صعب جدا عليا أن أحقق حاجة فيه و كان أول سيشن عملته منجحتش فيه لأني كنت خايفة منجحش و الخوف مش حاجة حلوة خالص و بعدين قررت أن مخفش و أشوف أي كاميرا على أنها حاجة بحبها و بتكلم معاها ساعات كمان و من ساعة ما بقيت أثق في شغلي و أن أعرف أقدم حاجة كويسة بقيت أنزل سيشنات أكتر و أفهم أكتر في المجال و أحبه أكتر و أديله من وقتي أكتر و أفضيله حياتي كلها عشان ياخد حقه و يديني اللي انا عايزاه لحد ما بقيت بسمع الناس بتتكلم عني حلو و تحب تشتغل معايا و يطلبوني مش مرة لاء مرتين و تلاتة و حاليا بدرس في مجالي لأني ناويه اعمل كورسات في ال Modeling اللي يخص البيوتي و دي خطتي اللي جايه و الحمدلله دلوقتي أنا في أحسن حالاتي و أتكرمت و عندي تكريم تاني .
س : هل أهلك كانوا موافقين تدخلي المجال ده؟؟ ج : أهلي كانوا موافقين و خصوصا ماما و هي اللي كانت بتشجعني على كل حاجة .
س : أيه ردود أفعال الناس و ردود أفعال أهلك على شغلك؟؟ ج : كانت ردود الناس حلوة جداا و أهلي كانوا مبسوطين باللي بعمله جدا .
س : أيه أكتر موقف أثر فيكي في حياتك؟؟ ج : موت عمي هو الحقيقة مش عمي ده جوز خالتو بس كان حاجة كبيرة جدا في حياتي و معرفتش ده غير لما أتوفى و كان نفسي يكون موجود عشان يشوف صوري و يشجعني لأنه حد مهم في حياتي جدا و كان هيفرح باللي حققته .
س : لو الزمن رجع بيكي إيه الحاجة اللي هتعمليها و إيه الحاجة اللي مش هتعمليها؟؟ ج : الحاجة اللي مش هعملها أني مش هثق في أي حد نهائي لأن الناس وحشة جدا. و اللي كنت هعمله أن بردو مش هثق في حد .
س : أيه الفكره اللي عايزه توصليها من خلال شغلك؟؟ ج : أن أوصل لكل بنت أن اللي عايزه حاجة بتعملها و أنا كنت عايزة ده و فضلت وراه و عملت اللي أنا عايزاه .
س : أيه النصيحة اللي تحبي تقوليها لكل بنت نفسها تكون موديل؟؟ ج : أن البنت تحب المجال ده بكل تفاصيله حتى لو متعب و صعب و في الآخر هتكون عملت حاجة و تفضي نفسها ليه حرفيا و يكون عندها إستعداد في أي وقت للشغل .
بنشكرك جدا على الحوار الجميل ده و دايما في نجاح أن شاء الله ♥?