حوار شيق مع ” دونا محمد ” الموديل الجميله التي تتحدى الظروف للوصول للنجاح .
-
س : عرفينا بنفسك؟؟
ج : دوما محمد عندي 20 سنه بدرس في كلية تجارة بس مأجله إتولدت في محافظة المنوفية وعايشه في القاهرة .
س : كلمينا اكتر عن حياتك؟؟
ج : أنا والدي متوفي عايشة مع ماما بشتغل و بصرف على البيت مش زي ما الناس اللي بتحكم بالمظهر فكرة إن دي بنت دلوعه ومتعرفش تعمل حاجة حياتي صعبة شويه بس بحبها وبحب اعافر .
س : احكيلنا قصة حياتك من أول ما بدأتي في المجال ده لحد اللحظة دي؟؟
ج : أول ما بدأت تقريبا كان سني 16 سنة عن طريق السوشيال ميديا بدأت بقى أشتغل كنت بقابل ناس كويسة وناس لاء ناس محترمة بتقدرني وتديني حقي وناس إستغلالية و مريضة لدرجة إن حتى صور شغلي مكنتش باخدها لحد دلوقتي أكيد بقابل ناس إستغلالية ولحد دلوقتي ليا صور شغل كتير عند ناس كتير بس بقيت أختار الناس اللي أشتغل معاهم واللي مش بيقدرني مش بنزل معاه شغل أنا مش بس بنزل الشغل ده أنا عندي شغل تاني أنا بنزل الشغل ده عشان بحبه بحاول دايما أطور من نفسي و رغم كل ده أنا بالنسبالي لسه معملتش حاجه أو بمعنى أصح لسه موصلتش للي أنا عايزاه مش بس في المجال ده في حياتي عموما من و أنا صغيرة أنا دايما عندي هدف وحلم مش حابه أعيش كده ماليش لازمه بحب الإختلاف والتميز قرار إن إحنا نسيب المنوفية ونعيش في القاهرة كان قراري مع إني كنت صغيرة بس ماما كانت دايما واثقه فيا أنا أخدت القرار ده عشان مكنتش عايزة أفضل مكاني و مكمله .
س : إيه أكتر موقف أثر في حياتك؟؟
ج : هو مش موقف واحد هما أكتر من موقف أثر في حياتي هقول أول موقف كان وفاة والدي وعشان أنا بنت طبعا طول الوقت بكون محتاجه لوجوده وبعد وفاته بقيت أنا لنفسي الأب والأخ وكل حاجه من هنا بقى بدأت المواقف المؤثره .
س : لو الزمن رجع بيكي إيه الحاجه اللي هتعمليها وإيه الحاجه اللي مش هتعمليها؟؟
ج : زي ما هي كده أنا راضية جدا عن كل حاجه عملتها حتى لو غلط إحنا أصلا مخلوقين نغلط ونتعلم .
س : هل أهلك كانوا موافقين أنك تدخلي المجال ده؟؟
ج : أخواتي لاء بس ماما كانت دايما جنبي وطبعا بتخاف عليا هتتصوري مع مين؟ هتتصوري إيه؟ وقلق الأمهات يعني .
س : ايه الهدف اللي عايزه توصليه من شغلك؟؟
ج : مش بس المجال ده من أي مجال عموما حابه أقول لكل بنت خلي ليكي شخصية مستقلة أشتغلي الشغل اللي بتحبيه خلي عندك طموح إرسمي حياتك زي ما أنتي عايزه .
س : إيه خطواتك اللي جايه في شغلك؟؟
ج : هحاول طول الوقت أطور من نفسي ومن شغلي كالعاده .
س : لكل بنت حابه تشتغل في المجال ده تنصحيها بإيه؟؟
ج : تظلط شكلها عموما و تاخد بالها أوي من الناس اللي بتتعامل معاهم تفضل واثقه في نفسها وتعرف قيمة نفسها عشان الناس تقدرها .
بنشكرك جداا على الحوار الجميل والممتع ده و ربنا يوفقك وتحققي اللي بتتمنيه إن شاء الله. ?
