عارفه عبدالرسول تروى تفاصيل إستضافتها فى ”رامز نيفر إند”
نشرت الفنانه "عارفة عبدالرسول "عبر صفحتها الشخصية على ميتا تفاصيل إستضافتها فى برنامج المقالب "رامز نفر إند"، وذلك بعد إذاعة حلقتها من البرنامج فى أول أيام العيد
وأكدت الفنانة انه تم التواصل معها لإستضافتها فى إفتتاح أحد المحلات التجارية فى البوليفارد فى المملكة السعودية ، وتم إستقابلها بمنتهى الترحاب ،و تم التعامل معها كملكة بما لا يستدعى أى شك أن يكون الأمر برنامج مقالب
وسردت التفاصيل قائلة " إتصلت بيا واحده وبكل الحب قالتلى احنا بنفتخر بيكى ونفسنا تحضرى معانا افتتاح محل فى البوليفارد...من فرحتى مسالتش محل ايه لان كان نفسي اروح السعوديه وكل اللى شغلنى الوقت وزنقه رمضان ...بس البنت كانت شاطره وعرفت تدبر الميعاد...اخلص تصوير واطلع ع المطار الحق اخر طياره افتتح المحل واطلع ع المطار...كده يعنى صد رد ولكم ان تتخيلوا الارهاق والتعب...
من أول ماحطيت رجلى فى المطار وانا باعامل كملكه..خدمه مرحبا وكبار زوار وحوسه....وصلت اخدتنى عربيه فارهه الى فندق هيلتون الرياض ونزلت فى حته نتفه سويت يجرى فيه الخيل وكل حاجه تاتش بقيت خايفه المس حاجه تفرقع فى وشى...الروم سيرفز كل شويه يخبطوا جايبين تحيه من مدير الاوتيل وكارت بالانجليزى معناه ان اداره الاوتيل فى غايه الانفشاح لاستقبالى..
أفتح التليفزيون الاقى صورى بفيديو لطيف وقد ايه احنا مش مصدقين انك معانا...تخيلوا معايا بس الحاله اللى انا فيها...الصبح جم بنات كوافير وماكيير والبنت اللى اتصلت بيا واسمها شريفه...بقت تسالنى اسئله عرفت بعدين انها بتشوف شغلها...اطمنت عليا لانى جايه من تصوير واصرت انى اطلب اكل واكل قبل ماننزل...
وصلت قابلتنى المذيعه الجميله كارلا المريحه للعين والقلب وخضت تجربه السهم والخيل وانا فرحانه وقصيت الشريط بمقص تحفه ودخلت ع المطعم اللى كل حاجه فيه بتلمع قوى والشياكه والجمال وانا بازداد سعاده وفرحه مافرحتهاش عمرى ...
ووصل الشيف الكبير هو انا فعلا استغربت شكله وقولت لنفسى انه شبه الارهابيين اسود ف اسود كده...وانا مشرئبه قوى وحاسه انى يسرا ولا مرفت امين ...هوب لبست التورتايه...انتوا متخييلين...طلعت سابع سما ونزلت على جدور رقبتى...مش مهم المقلب ..صدمتى النفسيه محتاجه علاج فعلا...
انا باحب رامز من زمان وعارفه أنه الواد الشقى بتاع العيله وفرحانه بيه انه ماسك فى الواد ده ومش بيتغير حتى افلامه شقيه....لكن برضه مش كده...يعنى افرض جرى لى حاجه...انا طول عمرى صريحه معاكم وفعلاً ماكنتش اعرف وده اللى حصل...اما الست شريفه والسيد رامز ليهم روقه بس اتعالج من الصدمه الاول"
هذا والجدير بالذكر أن رامز جلال هذا الموسم أعتمد على نوعين مختلفين من المقالب، وكانت ردود الأفعال متفاوته مابين إستمتاع الفنانين بالمقلب أو بإنزعاج البعض الأخر ك الفنان على الحجار .
