زفّة التاريخ

بقلم - فاطمة عبدالواسع

زغرطي يا مصر، والدنيا غنّي يا نيل

ده يوم فرحك، يوم جميل وأصيل

النهارده التاريخ بيزفّك بفرحة سنين

ولابسك فخر العصور، وتاجك يبرق في العيون

افرح يا مصري، ده يومك الكبير

العروسة بلدك، يا سلام عالتقدير

يا عمّ مين قدّك؟

العالم كله جاي يهنّيك

، يشوف جمال عروستك الي مالوش مثيل

الحضور بالزي الفرعوني

والدعوة على ورق بردي

يا حلو، يا اللي الزمن شاهد على زواجك

والتاريخ هو اللي بيكتب ويعلّي كتابك

عروستك ما ليهاش مثيل

وأهلها جايين من كل فجٍّ عميق

يشوفوا قد إيه إنت مقدّرها

وهي، من دون الخلق، اختارتك خيالها

يا مصري، ده إنت محسود

البس فرعوني، وزوّد الخرز الأزرق

واتبخّر بالمسك والعود

وخلي النيل يغنّيلك،

والمراكب تزغرد باسمك

وارمي تراب بخورك في نيلك

يتوزع في ترعك وجسورك

ويروي زرعك ونخيلك

الله أكبر

بسم الله عليك

وعلى عروستك

وعلى أرضك وسماك

وزفّة التاريخ ماشية،

صوتها في كل بيت وحارة

بتقول يا مصر…

الفرح ليكي،

والدهر شاهد على اختياري ليكي