الفنانه ” حلا شيحه” اسرار وحكايات
في ليلة من ليالي 2005 كانت الفنانة المصرية حلا شيحة بتحضر حفلة لفرقة وسط البلد الغنائية، وهناك اتعرفت على واحد من مؤسسين الفرقة، وهو الفنان المصري هاني عادل، وحصل اعجاب بينهم من اللقاء الأول، وبناء عليه أدوا لبعض أرقام تليفوناتهم، وبسرعة بدأوا يتكلموا لحد ما اتحولت مشاعرهم من اعجاب لحب، وعلى مدار سنة ونص عاش حلا وهاني قصة حب قوية جداً بعيدة عن أنظار الإعلام، وكانوا ساعتها مقتنعين أن الأضواء ممكن تبوظ علاقتهم وده فعلاُ اللي حصل
في فبراير 2006 وبعد ما حلا خدت قرار الحجاب، احتفلت الفنانة بكتب كتابها على هاني، وكانوا ساعتها حديث الصحف والمجلات، والكتير ربط بين الحجاب ورغبة حلا في الاستقرار والابتعاد عن الفن، وكانت ساعتها بتصور آخر أفلامها قبل الاعتزال وهو كامل الاوصاف أدام النجم المصري الراحل عامر منيب.
5 شهور بالظبط وكان خبر انفصالهم صدمة للكل، خاصة أنهم كانوا على بعد أيام من الاحتفال بزفافهم، والغريب أن وقتها سافرت حلا للبنان عشان تكمل تصوير الفيلم، وهاني قفل تليفونه وطار على فرنسا، ومحدش كان فاهم ايه اللي بيحصل بالظبط، وفي الوقت اللي متكلمتش حلا لحد دلوقتي عن سبب انفصالها عن هاني عادل، وقتها قال الفنان في تصريحات صحفية إن الانفصال حصل غصب عني أنا وحلا
.
كلام كتير اتقال وقتها عن أسباب انفصال الحبيبين، أهمهم، اكتشاف حلا أن هاني عايز يطلع على كتافها، ويحقق شهرة ونجومية على حسابها، خاصة أنها كانت بالفعل نجمة كبيرة
تاني سبب انتشر ساعتها عن سبب قرار حلا بالانفصال عن حبيبها، هو مخالفة هاني لوعده معها بعدم الرجوع لمراته الفرنسية اللي كان على خلاف معها، واتقال أن مرات هاني لما عرفت قرار جوازه من حلا، بدأت تلطف الأجواء ما بينهم، وتحنن قلبه على بناته، وتقنعه بأن البنات ضروري يعيشوا ما بينهم، والغريب أن هاني بمجرد ما دبت الخلافات ما بينه وبين حلا، سافر فرنسا على طول ومحاولش حتى يستنى في مصر عشان ينفصلوا بشكل رسمي، وده اللي خلى الامور تسوء أكتر، وحلا تصمم على موقفها.
أما السبب الصريح اللي أكده هاني عن سبب انفصاله عن حلا فكان ضغوط الشهرة وأضواء النجومية لما قال الناس كانت مركزة معانا جداً، وبتابع بشغف كل حاجة بتحصل بنا، ونفى تماماً أن يكون شغل حلا في الفن بعد ما لبست الحجاب له علاقه بانفصالهم بل بالعكس أكد هاني أنه ديماً كان بيشجعها على الاستمرار في شغلها وقال مليش علاقة بمسألة لبسها للحجاب من قريب أو بعيد.. هي حرة
