حوار صحفى مع مصمّمة الجلود الطبيعية المبدعة سفيرة النجاح الباهر شيرين سلام

لطالما كانت صناعة الجلود لاعباً رئيسياً في سوق التجارة العالمية لآلاف السنين، بل يزعم البعض أنها قد تكون ثاني أقدم مهنة في العالم. اليوم أصبحت بلا شك صناعة كبرى ذات أهمية اقتصادية ضخمة على المستوى الدولي، ففي عام واحد فقط، يتم إنتاج 23 مليار قدم مربعة من الجلد، وهو ما يمثل نحو 45 مليار دولار ومع ذلك، لم تتأثر الصناعة منذ نشأتها، لكنها شهدت العديد من التغييرات المهمة التبعات، خصوصا في السنوات الاخيرة وتنفرد جريدة انباء اليوم المصريه بحوار صحفى مع سفيرة الجلود الطبيعية شيرين سلام
عرفينا أكثر عن نفسك؟
شيرين سلام صاحبه براند Shereen Sllam Leather Craft من محافظة القليوبية مؤهلى بكالوريوس تجارة شعبة محاسبه من صغري عاشقه للهاند ميد بكل فروعه ولكن اكتر شيء جذبني وحسيت نفسي فيه هو الجلد الطبيعي فى البدايه الموضوع كان بالنسبه ليا متابعه الفيديوهات الاجنبيه فى تصنيع المنتج اليدوي وازاي بيطلع المنتج بالشكل المميز. بعدكده ابتديت اتعرف وابحث عن مدربين علشان ادرس كورس تأهلني انى اطلع منتج حلو لمجرد انى عايزه اعمل شنطه لنفسي الاول طبعا دخلت فى المجال وحضرت فى أماكن ماخدتش منها المعلومات الصحيحة والكافيه إلى أن توصلت للمدربين محترفين حضرت معاهم كورسات وبفضل الله قدرت اطلع منتج كويس واشتغلت على نفسي كتير

ما هي الخامات المستخدمة فى عملك؟
الخامات فى شغلنا طبعا الجلود بأنواعها على حسب الاستخدام من حيث النوع والعيار وايه ينفع شنطه وايه ينفع محفظه وايه ينفع يكون بطانه وكل حاجه ولها استخدام. طبعا الزاوية القايمه وبرجل العلام والشوك اللى باستعملها فى التخريم والصبغات بقى والكوله وكريمات الفنش وكده

من اكثر شخص دعمك في مشوراك؟
اكتر شخص دعمنى هو زوجي وحبيب عمري ربنا يرحمه فى بدايتي هو شجعنى جدا وكان بيقولى دايما شغلك ان شاء الله هيبقى عالمى كنت اتمنى انه يكون معايا فى كل خطوة نجاح ربنا يرحمه

ماهي الصعوبات التي واجهتك في طريقك لنجاح؟
الصعوبات اللى على المستوي العام لكل اللى بيتعامل فى الهاند ميد طبعا التسويق لان فى ناس مش بتفهم يعنى ايه مجهود هاند ميد وطبعا واجهتني صعوبات فى بدايه الكورسات فى كل الخطوات من الدقه اللى المفروض تطلع فى شغلى مع ظبط الباترونات والجروح اللى بتحصل فى ايدينا حبايب الهاند ميد

نصيحه لمن يريد العمل في المجال
نصيحه لمن يريد العمل فى المجال مايشتريش اي عدد لمجرد انه شاف فيديو وحد بيستعملها فى الفيديو لكن لو اخد كورسات مع مدرب مميز هيفيديه من كل الجوانب من حيث نوعيات الجلد وملمسها والعيارات والعدد الأهم وبعد كده ازاي ممكن يطور من العدد لان كل ماكانت العدد مميزه بتطلع منتج محترم

نفسك توصلي لفين في المستقبل
طبعا بتمني ان شغلى يوصل للدنيا كلها ويتصدر ويبقى عالمى بأمر الله

كلمة اخيرة
وطبعاأشكر الأستاذة وفاء خروبه وجريدة انباء اليوم المصريه على الحوار الجميل ده ودايما موفقين أن شاء الله