ليلى طاهر: لما نزل خبر إشاعة وفاتي أزعجني وسبب ليا أذى نفسي

أوضحت الفنانة ليلى طاهر، سبب إبتعادها عن السوشيال ميديا خلال الفترة الأخيرة، بجانب الحديث عن انزعاجها من شائعات وفاتها التي تتعرض لها مؤخرًا.

وقالت ليلى طاهر في إحدى اللقاءات :لما نزل خبر إشاعة وفاتي أزعجني وسبب ليا أذى نفسي ولما بشوف زملائي في الوسط بيطلع عنهم شائعات وفاة بزعل جدًا وبضايق أصل هتستفاد إيه لما تطلع كده بس، وبعدين قولت يعني هما نزلوا إشاعات عن وفاتي ومبسوطين وأنا اللي هضايق ومتصدقوش كلام حد أنا بخير.

وأوضحت ليلى طاهر: شائعات وفاتي خلتني أحس قد إي الناس بتحبني ومهتمة بيا جدًا، والناس أما بيشوفوني في الشارع أو في النادي بياخدوني بالحضن، وشفت حب الجمهورعامل إزاي بعد إشاعات وفاتي، بس الناس دلوقتي مبقتش تصدق شائعة وفاتي خلاص، واللي كانوا بيكلموني في الأول مخضوضين بقوا يشوفوني دلوقتي يضحكوا.

وعن سر ابتعادها على مواقع التواصل الاجتماعي، ردت ليلى طاهر: السوشيال ميديا كلها بقت بالنسبالي ممنوعة ومبقتش أقرأ تاني وابتعدت خالص، خليهم يكتبوا اللي هما عاوزينه بقى، وأنا زهقت منهم وممكن الفيسبوك اللي ممكن متفاعلة معاه شوية قليلين بس.

وكانت شاركت ليلى طاهر في العديد من الأفلام، منها: الناصر صلاح الدين، ولا تدمرني معك، وعفوًا أيها القانون، والاحتياط واجب، والمدمن، وحكمت المحكمة، وعاصفة من الدموع، وليالي ياسمين، وتضحك الأقدار، والطاووس، وقطة على نار، وزمان يا حب.