الجدع و الودع بقلم - دكتور / رفيق عفيفي
صبية قابلت الجدع
قالت له أشوفلك الودع
الدمع في عينه لمع
واضح ف قلبه كتير وجع
سيدي إرمي بياضك
إنشا الله تنول مرادك
و الفرح يدق بابك
يصونك ربي لأحبابك
البنت بيضة و زي القمر
غجرية يا مااحلى الغجر
تشوف عيونها تتسَحَر
رماها فِ سكِتُه القدر
البنت فرشت فرشتها
و رمت عليها ودعتها
بعد ما وشوش ودنتها
ياللا تورينا شطارتها
شكلك طيب و أمير
جواك أحزان كتير
للحب وقعت أسير
ماشي كما الضرير
البنت اللي إنت تحبها
قاسية كتير ف طبعها
شريرة و طالعة لأُمها
شيل دماغك منها
كلام الودع صريح
إنت مكسور جريح
عن سكتك و زيح
طير ف الكون الفسيح
شيل الخوف من طريقك
و اسمع كلام صديقك
وحده يفك ضيقك
عارف أسرار عشيقك
يا ما نصحك و قال
البنت حالها مال
طمعانة ف كل مال
و تشَرِد أي بال
مكتوب لك سكة تانية
امشي ما تتأخر و لا ثانية
حبوبة عطوفة حانية
مش هدامة دي بانية
رأي الودع و قال
يسعد معاها الحال
منها حتجيب عيال
أحمد .. عمر .. منال
و تعيش عيشة هنية
هنام الصبح ل العشية
الصورة واضحة و جلية
انت ما ليك إلا هية
