أَنَـا و حَــوَّاء للدكتــور - رفيــق عفيــفي
أول ما جَت رِجلي الدنيا و سَبقني الماء
مكُنتش أعرف إسمي و لا حتى اقول الحاء
أول كلمة أنطقها هي كلمة واء واء
يعني بالفصحي هو انتي أيوه انتي يا حواء
يا أول حضن في حياتي و كنتي أمي
يا أول حب عرفته و دمك هو دمي
أبعتر كل شيء و انتي ورايا بتلِمي
أبكي تمسحي دموعي و بتشيلي همي
حوا مش بس أمي دي أختي و ده حبي التاني
الحب و العطف و الحِنية ده ف طبعها رباني
اللقمة ما بيننا تكفي محدش فينا أناني
و ان حد لمسلها شعرة أطَلَع عليه جناني
يا اخواننا انتباه و سلام طبعاً للسِت حماتي
طِيبة و حِنية أمي و كفاية جابِتلي مراتي
حبيبتي و من غيرها ما تسوي حياتي
عسلية مصفية .. بالحب جابتلي بناتي
أميراتي دول و هُم العين و النني
حياتي .. حلوياتي و العشق اللي جَنني
هم روحي و سندي لما راح يزيد سِني
حوا .. من غيرها .. كَانت روحي تروح مِني
