آسف حبيبتي وسامحيني
كلمات : أحمد حسن عمر
رقيقة جدا فوق الوصف
وحنينة بشكل خرافي
ومهما يظلم فيا الخلق
هي اللي عايشة لإنصافي
نزعل تداري علي زعلنا
وسرنا جوه ف بيرها
وعشان ما يشمت عوزالنا
يومين خصام هم كبيرها
دايما تسامح وتطبطب
ونسمة صافية لأيامي
وعشان كمان قلبها أبيض
مش عاشقة ابدا لخصامي
ابعد كتير هي تقرب
تقولي دايما علي بالي
وانشغل عنها واهرب
فالقاها تسأل عن حالي
بتحفظ العيش والعشرة
ماخانتش ملحي ولا عهودي
من غير ايديها وكام نظرة
كان امتي راح تصفي ورودي
باغلط معاها اما اتكلم
فالقاها بتعدي ردودي
وكل ما ازعل واتألم
بنظرة تعدل لي ف مودي
غلطان ودايما تصارحني
وانا اللي افرط ف كنوزي
وهي اللي دايما تصالحني
قال ايه وانا بالوي ف بوزي
انا اللي عشت وحيد لسنين
والدمعة بايته علي خدودي
اعند واقول ما احناش راجعين
قلبي اللي بيقولها عودي
عايش ف حيرة ما بين قلبي
وعقلي اللي ماليش غيره
واشتاق لها مهما اخبي
وقلبي دا كتر خيره
ازاي اعيش وعيونها السود
بعيد ه عن عيني ليلاتي
غلطان حبيبتي وبكره اعود
فما تعمليش زي حالاتي
ابوس ايديها واقول ما نسيتش
كام مرة مسحت لي دموعي
واقول لقلبها ميت معلش
واسف عشان ترضي رجوعي
انا ح اوعدك لما الاقيني
ح اخدني واجي عشان اصالحك
وبدل ما تقسي وتنسيني
انا اللي راح اداوي ف جرحك
