الشاعر  أشرف عبدالكريم يكتب : البيوت أسرار 

شوفتي وصلنا لحد فين

شوفتي كلام الناس علينا

ياما فهمتك سنين

الحب مش لعبة ف ايدينا ..

كنتي عايزة مني إيه

واحنا في بداية الطريق

عايزة كام .. مليون جنيه

وابقى وسط الموج غريق ..

مش عارف أضحك ولا أبكي

طب قوليلي أعمل إيه

صدقيني كان بودي

أبني قصر تعيشي فيه ..

وانتي عارفة الإيد قصيرة

يادوب أوضة بكنبة وحصيرة

دي المشاعر مش بكام

ولا بشوية هدوم

يكفي اخر الليل ننام

عالمخدة بدون هموم ..

بس مش عايز ملامة

او تقولي انك جعانة

دي البيوت أسرار وياما

كلمة خربت ألف بيت ..

الكلام دلوقتي ليكي

والله بتكلم بجد

فكري وردي بعنيكي

أصل أنا مش أي حد ..

رغم فقري وقلة حيلتي

مش بقيلي غير كرامتي

هي أغلى حاجة عندي

هي رسمالي وضهري ..

لو وافقتي اهديكي عمري

وان رفضتي تبقي قدري

بس بردو لسة بدري ..

مش هقول أنا صبري مل

روحي نامي ولما تصحي

تيجي جري معاكي حل ..

تقولي أيوة تقولي لئة

مش مهم تقولي إيه

المهم تلاقي سكة

أو طريق تمشي فيه ..

أصلي شاعر مش طبيب

مش هطبطب أو أداوي

ده الجواز قسمة ونصيب

رغم إنك إختياري ..