أبوس إيدك

للشاعر / أشرف عبد الكريم

هنعمل إيه خلاص فيها
دي وخدانا ف طريق مسدود
ناقصنا نبوس على إيديها
ونفرش أرضها بورود ..

ونسأل ليه كدة يا دنيا
بتعملي كل دا فينا
ترد علينا في الثانيا
وتخنق طوق حوالينا ..

وترسم جرح ع الجبين
تبات الدمعة في عنينا
نقول يمكن معانا تلين
وتفتح قلبها لينا ..

لكن طبعها الغلاب
مخليها كدة راضية
تسد علينا مليون باب
وتحرقنا بنار هادية ..

ونصرخ زي خلق كتير
نمد إيدينا للمحبوب
ده رازق كل غني وفقير
بذكره تطمئن قلوب ..

يارب يا عالم الأسرار
ماتحوجناش لمين غيرك
بندعي الخير يعم الدار
يا خالق الكون لعبيدك ..