كنا لازم نموت ( إهداء لروح هيثم أحمد ذكي)

وتدعي لينا وهي بتدمع عنيها ماكنا بين ايديكم وريحتنا.

حواليكم وفرحنا كان مجرد السؤال عليكم .

عرفتوا قيمتنا لما بطلت رجلينا تمشي في شوارعكم .

إفتكرتوا ملامح وشوشنا لما هتغيب عنكم بشاشتنا.

ولما اتحايلنا عليكم حتي لو نسلم وايدينا في ايديكم .

وكان الوقت طويل علينا ونتمني لو رنة من كلمة تحس بالي فينا .

كنا لازم نموت عشان تصدق قلوبكم ان كنا محتاجين ضمة صدوركم .

كنا لازم نموت وتشوفونا في تابوت متشال ولامساه الكفوف
الكفوف الي كنا بنجري عليها عشان تطبطب علينا وتستخسروها فينا وتلعنوا الظروف.

كنا لازم نموت عشان دمعتكم تنزل علي اللحود .

كنا بنام لوحدنا ونتغطي يهمنا وسرايرنا تستحمل سهرنا
ونشتكي لليل تقصيركم ونبص في المرايا ونبكي علي قسوتكم .

كنا لازم نموت عشان تحبونا وتفتكروا قد ايه وجعتونا

كنا لازم نموت عشان تندموا أن كان ممكن يوم تتجمعوا
وتاخدوا بايدينا وتسمعوا لأنين صدورنا وجرحنا وغياب أبونا وأمنا .

والعيلة الي ناسية ورامية دمها والحب الي كان خاين الي جري لما احتاجنا ليه حتي لو مجامل.

كنا لازم نموت وتدورا في الصور وتركزوا في عيونا وتشوفوا
اسرارها وتحللوا احمرارها من كتر وحدتها ومرارها .

كنا لازم نموت وتموت زهرة شبابنا عشان تتصعبوا علي كتمة حياتنا .

ادينا هنرتاح وننسي ونروح للبراح ونحضن الغالين من غير جراح وداع يادنيا وسماح لكل الي عدي وراح

كنا لازم نموت بس معانا وعود اننا هنفضل جوه القلوب .